Пілотам бізнес-джэта, які зваліўся ў гарах Афганістана, анулявалі пілоцкія пасведчанні за тое, што яны падавалі недакладныя звесткі. Абодва лётчыкі падрабілі дакументы пра падрыхтоўку да кіравання Falcon 10, паведамляе расійскае выданне «Известия» са спасылкай на крыніцы ў Мінтрансе.
Сертыфікаты Дзмітрыя Белякова і Аркадзя Грачова пра навучанне палётам на Falcon 10 у ЗША аказаліся фальшывымі. Падчас расследавання высветлілася, што сярод вучняў цэнтра іх не было і яны спецыяльна падрабілі дакументы, каб выконваць рэйсы на бізнес-джэце Falcon 10. Выдадзеныя ім пасведчанні анулявалі 26 студзеня.
Акрамя гэтага, камандзір экіпажа Дзмітрый Белякоў не падаў звестак пра свой узровень англійскай мовы. Ён вучыўся лётаць на двухмесным аднаматорным Tecnam P2002 Sierra, пасля лётаў на P2006 Sierra. Усяго за яго спінай 2,4 тысячы гадзін палётаў. Другі пілот, Аркадзь Грачоў, налётаў 870 гадзін, навучаўся лётаць на розных самалётах, у тым ліку праходзіў падрыхтоўку на Airbus A320 і Boeing 737 у навучальным цэнтры S7 Airlines.
У экспертаў узніклі пытанні і да стану Falcon 10, які разбіўся. Згодна з іх высновамі, на 45-гадовым самалёце не выканалі больш за 15 абавязковых работ па тэхабслугоўванні, а борт не праходзіў абавязковага паўгадавога абслугоўвання.
Нагадаем, самалёт Falcon 10 (рэгістрацыйны нумар RA-09011) 21 студзеня выконваў чартарны санітарны рэйс па маршруце Утапаа (Тайланд) — Ташкент — Масква. На борце знаходзіліся два пасажыры і чатыры чальцы экіпажа. Борт эвакуяваў з Тайланда расіянку, якая да гэтага знаходзілася на апараце ШВЛ. Паводле інфармацыі ад афганскай паліцыі, аварыя адбылася ноччу ў аддаленым горным раёне ў паўночнай частцы Афганістана.
У выніку авіякатастрофы загінулі пацыентка і яе муж. Чатыры чалавекі, у тым ліку два пілоты, выжылі. Адзін з выжылых сам дайшоў да вёскі ў Афганістане і жэстамі папрасіў дапамогі. Выжылых перадалі «Талібану», пазней іх даставілі ў Расію.