У Міністэрстве абароны Расіі заявілі, што працягваюць паспяхова наступаць пад Данецкам і Запарожжам, займаючы «новыя выгадныя рубяжы». Ва ўкраінскім Генштабе адзначылі, што Расійская Федэрацыя пад выглядам вучэнняў нарошчвае сваю авіяцыйную групоўку ў Беларусі. У Інстытуце па вывучэнні вайны аналізуюць, чым канфлікт паміж Прыгожыным і Гіркіным можа быць выгадны Пуціну.
Расказваем пра галоўнае са зводак штабоў і высноваў экспертаў на 338-ы дзень вайны ва Украіне.
Генштаб УСУ: адбілі расійскія атакі на Бахмут і Вуглядар
За мінулыя суткі расійскія войскі нанеслі 44 авіяцыйныя ўдары, 18 з іх — з выкарыстаннем БПЛА тыпу Shahed-136. Правялі 70 пускаў ракет і 125 абстрэлаў з рэактыўных сістэм залпавага агню. Як адзначае Генштаб УСУ ў ранішняй зводцы, у выніку загінулі і пацярпелі мірныя людзі, разбураныя цывільныя аб’екты.
— На Валынскім, Палескім, Северскім і Слабажанскім напрамках артылерыйскім абстрэлам падвергліся раёны 16 населеных пунктаў; на Купянскім — дзесяць; на Ліманскім напрамку пад агонь трапілі раёны сямі населеных пунктаў; на Бахмуцкім — дзесяць; на Аўдзееўскім напрамку абстраляныя шэсць населеных пунктаў; на Навапаўлаўскім — тры; на Запарожскім напрамку ад артылерыйскага агню пацярпелі раёны больш чым 20 населеных пунктаў; на Херсонскім напрамку расійскія войскі працягваюць абстрэльваць Херсон.
— Падраздзяленні Сіл абароны за мінулыя суткі адбілі атакі праціўніка ў раёнах населеных пунктаў Плашчанка, Неўскае і Чырвонапапоўка Луганскай вобласці і Верхнякаменскае, Параскавіеўка, Бахмут, Кляшчэеўка, Вадзяное, Невельскае, Мар'інка і Вуглядар у Данецкай вобласці.
— Украінская авіяцыя цягам мінулых сутак нанесла восем удараў па раёнах канцэнтрацыі праціўніка, а таксама ўдар па пазіцыі яго зенітна-ракетнага комплексу. Акрамя таго, былі збітыя тры варожыя разведвальныя БПЛА.
— Падраздзяленні ракетных войскаў і артылерыі Сіл абароны Украіны нанеслі ўлары па чатырох пунктах кіравання, раёне канцэнтрацыі жывой сілы праціўніка, двух раёнах канцэнтрацыі артылерыі, складзе боепрыпасаў і двух іншых важных аб’ектах.
У Генштабе УСУ таксама адзначылі, што ў Беларусі працягваюцца сумесныя вучэнні, пад выглядам якіх Расійская Федэрацыя нарошчвае авіяцыйную групоўку на тэрыторыі краіны.
Мінабароны РФ: нанеслі паражэнне 79 падраздзяленням УСУ
У расійскім ваенным ведамствее пракаментавалі ўчорашнюю атаку на Украіну, а таксама заявілі, што працягваюць наступаць на Данецкім, Паўднёва-Данецкім і Запарожскім напрамках.
— На Купянскім напрамку артылерыя «Заходняй» групоўкі войскаў нанесла агнявое паражэнне жывой сіле і тэхніцы падраздзяленняў 103-й брыгады тэрытарыяльнай абароны ў раёне населенага пункта Пясчанае і 14-й механізаванай брыгады УСУ ў раёне населенага пункта Сінькоўка Харкаўскай вобласці. Знішчаныя больш за 30 вайскоўцаў, два аўтамабілі, артылерыйская сістэма М-777 і гаўбіца Д-20 УСУ.
— На Чырвона-Ліманскім напрамку авіяцыя і артылерыя групоўкі войскаў «Цэнтр» нанеслі ўдар па падраздзяленнях 24-й і 92-й механізаваных брыгад УСУ ў раёнах населеных пунктаў Астроўскае Харкаўскай вобласці і Стальмахоўка Луганскай вобласці. Страты УСУ склалі да 40 вайскоўцаў забітымі і параненымі, тры баявыя браніраваныя машыны, тры аўтамабілі, гаўбіца Д-20, а таксама артылерыйская сістэма М-777. Акрамя таго, у раёне населенага пункта Шчурава Данецкай вобласці знішчаны склад артылерыйскіх боепрыпасаў УСУ.
— На Данецкім напрамку падчас паспяховага наступу «Паўднёвай» групоўкі войскаў за дзень знішчаныя больш за 80 украінскіх вайскоўцаў, адзін танк, тры баявыя машыны пяхоты, тры пікапы, адна гаўбіца Д-20, дзве гаўбіцы Д-30, адна гаўбіца «МСТА-Б», а таксама самаходная артылерыйская ўстаноўка Paladin і радыёлакацыйная станцыя контрбатарэйнай барацьбы AN/TPQ-50.
— На Паўднёва-Данецкім і Запарожскім напрамках падраздзяленні групоўкі войскаў «Усход» працягвалі наступальныя дзеянні, заняўшы новыя выгадныя рубяжы, і нанеслі агнявое паражэнне падраздзяленням 72-й механізаванай брыгады УСУ ў раёне населенага пункта Вуглядар, а таксама 108-й брыгады тэрытарыяльнай абароны ў раёнах населеных пунктаў Прачыстаўка і Навасёлка Данецкай вобласці. Агульныя страты УСУ за суткі на гэтых напрамках склалі да 65 вайскоўцаў, адзін танк, дзве баявыя браніраваныя машыны, гаўбіца Д-20, тры аўтамабілі і дзве радыёлакацыйныя станцыі контрбатарэйнай барацьбы AN/TPQ-37.
— На Херсонскім напрамку знішчаная ўстаноўка РСЗА «Град», адна артылерыйская сістэма М-777, а таксама склад артылерыйскіх боепрыпасаў УСУ.
Усяго, паводле МА РФ, за суткі нанесенае паражэнне 79 падраздзяленням, жывой сіле і ваеннай тэхніцы УСУ ў 102 раёнах. Знішчаная радыёлакацыйная станцыя зенітнага ракетнага комплексу С-300. Збіты самалёт Су-25 Паветраных сіл Украіны і 11 беспілотных лётных апаратаў. Перахопленыя 14 рэактыўных снарадаў сістэмы залпавага агню «Вольха», «Ураган» і HIMARS.
Інстытут па вывучэнні вайны: ПВК Вагнера панесла значныя страты на ўсходзе Украіны
Рускія нацыяналістычныя групы канкуруюць паміж сабой за палітычны ўплыў у Расіі. Сведчанне гэтага — нядаўняя сварка паміж уладальнікам ПВК Вагнера Яўгенам Прыгожыным і былым расійскім афіцэрам Ігарам Гіркіным, гаворыцца ў свежай справаздачы амерыканскага Інстытута па вывучэнні вайны (ISW). Гіркін абвінаваціў Прыгожына ў тым, што звязанае з ім выданне РІА ФАН спрабавала дыскрэдытаваць яго, а сам Прыгожын, замест таго каб задзейнічаць усіх сваіх наймітаў для перамогі ва Украіне, працягвае адпраўляць іх у Сірыю і афрыканскія краіны. Прыгожын у адказ заявіў, што ў яго няма палітычных амбіцый, і саркастычна прапанаваў Гіркіну далучыцца да аднаго са штурмавых атрадаў ПВК Вагнера ў Луганскай вобласці.
І Прыгожын, і Гіркін крытыкуюць вядзенне вайны прэзідэнтам Расіі Уладзімірам Пуціным — імаверна, спаборнічаючы за ўплыў і заступніцтва сярод праваенных палітыкаў, расчараваных ходам вайны, кажуць эксперты. Разам з тым яны адзначаюць, што нападкі Прыгожына на Гіркіна («аднаго з самых вядомых крытыкаў Пуціна») могуць быць выгадныя прэзідэнту РФ. Паколькі Прыгожын займае вельмі заўважнае месца ў расійскай інфармацыйнай прасторы, многія ваенныя блогеры ўжо абвінавацілі Гіркіна ў адсутнасці баявога досведу і баязлівасці, што падрывае яго аўтарытэт.
Расійскі прэзідэнт таксама працягвае сваю кампанію супраць нязгодных, расправіўшыся з некалькімі буйнымі апазіцыйнымі СМІ і падтрымліваючы вельмі крытычна настроеных расійскіх блогераў. 25 студзеня Пуцін падпісаў закон, згодна з якім некалькі буйных СМІ, у тым ліку «Медуза», «Важныя гісторыі», Bellingcat, The Bell і The Insider абвяшчаюцца непажаданымі арганізацыямі ў Расіі. Аднак Пуціну дагэтуль не ўдалося ўтаймаваць вельмі крытычна настроеных расійскіх ваенных блогераў-нацыяналістаў, якія ўжо даўно крытыкуюць і падрываюць аўтарытэт як Мінабароны РФ, так і Крамля і нават самога Пуціна. У ISW мяркуюць, што Пуцін, імаверна, спадзяецца стварыць групу лаяльных блогераў, каб падарваць пазіцыі такіх праціўнікаў, як Прыгожын і Кадыраў.
На што яшчэ звярнулі ўвагу эксперты:
- 26 студзеня расійскія войскі нанеслі яшчэ адну серыю масіраваных ракетных і беспілотных удараў па тэрыторыі Украіны;
- міністэрства фінансаў ЗША абвясціла пра новыя санкцыі ў дачыненні да ПВК Вагнера, імаверна, у адказ на актывізацыю ПВК за межамі Украіны;
- расійскія крыніцы сцвярджалі, што ўкраінскія сілы аднавілі контрнаступальныя аперацыі ў раёне Крамянной;
- расійскія сілы працягвалі наземныя атакі ў раёне Бахмута, на заходняй ускраіне Данецка і ў раёне Вуглядара;
- украінскія афіцыйныя асобы паведамілі, што наступальныя аперацыі расійскіх войскаў у Запарожскай вобласці не сведчаць пра поўнамаштабны наступ;
- расійскія ваенныя блогеры сцвярджалі, што расійскія войскі працягвалі праводзіць абмежаваныя і лакальныя наземныя атакі ў Запарожскай вобласці;
- ПВК Вагнера, імаверна, панесла значныя страты за апошнія некалькі месяцаў у наступальных аперацыях на ўсходзе Украіны;
- расійскія акупацыйныя ўлады працягваюць «нацыяналізаваць» уласнасць і закрываць месцы адпраўлення культу, якія належаць украінскім евангельскім баптысцкім хрысціянскім суполкам у акупаванай Запарожскай вобласці, спрабуючы зрабіць афіляваную з Крамлём Праваслаўную царкву Маскоўскага патрыярхату даміноўнай канфесіяй у рэгіёне.
