Прарасійская актывістка Вольга Бондарава незадаволеная новым прапагандысцкім фільмам пра беларусаў, якія з’ехалі. Яна лічыць, што гэта як у часы СССР здымаць фільмы пра калабарантаў.
«Может я темная? — задалася пытаннем Бондарава (аўтарскае напісанне захаванае. — Заўв. рэд.) — Расскажите мне, зачем снимать фильм о тех, кто свалил после майдана 2020? Это тоже самое, если бы в советском союзе снимали фильм о коллаборантах и прислужниках-полицаях».
На яе думку, варта было б даведацца, як маюцца тыя, хто падтрымаў уладу Лукашэнкі ў 2020 годзе.
«Чем дальше уходишь от политики, тем больше становятся волосы дыбом от новостей.
2020 ничему не научил. Кто генерирует эти идиотские идеи?» — абурылася Бондарава.
Абурыў фільм і яе ідэалагічных праціўнікаў — тых самых беларусаў, якія пакінулі краіну праз рэпрэсіі.
«Прапаганда паказвае беларусаў, якія з’ехалі, як нейкіх апантаных „развальвальнікаў рэжыму“, якія там усе разам за адну ідэю і культ ЛГБТ да кучы. А па факце адзіная купка апантаных — гэта сам рэжым. Вунь ужо пяць гадоў прайшло, а ў іх Азаронак „азарыцца“, фільмы выходзяць, прыдумляецца 100 новых спосабаў, як бы тым, хто з’ехаў, дадзець, як бы яшчэ ім жыццё сапсаваць, як падставіць і гэтак далей. І не перагарае ж у іх, на чыстай сіле нянавісці робіцца, нават не за грошы. А ў гэты час тыя, што з’ехалі, за гэтыя пяць гадоў ужо страцілі запал або і не мелі ніякіх ідэй, хацелі проста жыць нармальна, вось і ўсё. Гэта выглядае, нібыта хуліган з паралелі б’е нагамі батаніка з задняй парты, які нават да яго і не лезе, проста існуе і бесіць», — лічыць адна з беларусак за мяжой.
Нагадаем, Белтэлерадыёкампанія 18 сакавіка прэзентавала прапагандысцкі фільм «Чужое неба» аўтарства Аляксея Марцінёнка. У паўтарагадзінным відэа расказваецца пра цяжкі лёс беларусаў у Польшчы і краінах Балтыі, дзе яны, маўляў, ледзь зводзяць канцы з канцамі.
Як высветліла «Наша Ніва», у герояў відэа, якія знаходзяцца за мяжой, узялі інтэрв'ю падманам — яны не ведалі, што каментуюць сваё жыццё для беларускіх прапагандыстаў: да іх звярнуліся з просьбай паўдзельнічаць у здымках відэа для Офіса Святланы Ціханоўскай. Сама лідарка дэмсіл гэта абвергла.
Пазней стала вядома, што муж галоўнай гераіні фільма, Юліі Брыкінай — адзінай з фільма, хто знаходзіцца ў Беларусі, а не за мяжой, быў знойдзены мёртвым у Літве.