Пра смерць палітвязня Дзмітрыя Шлетгаўэра стала вядома на мінулым тыдні. 22-гадовы хлопец адбываў тэрмін у ПК-15, што ў Магілёве. З якой прычыны памёр Дзмітрый, праваабаронцы не паведамлялі. Знаёмы сям'і Шлетгауэра расказаў «Люстэрку», якую прычыну медыкі паставілі ў пасведчанні пра смерць.
Паводле знаёмага сям'і, які цяпер жыве за мяжой, у пасведчанні пра смерць палітвязня стаіць прычына — «механічная асфіксія». Вельмі часта такі запіс робяць пры самагубствах.
— Кіраўніцтва калоніі не паведаміла родным Дзмітрыя, што менавіта здарылася з ім, — сцвярджае ён.
Паводле нашага суразмоўцы, блізкія палітвязня размаўлялі з ім праз лісты. Жонка Дзмітрыя наведвала яго ў СІЗА № 7 Брэста да і пасля суда.
— Сям'я лічыць, што Дзмітрый не збіраўся забіваць сябе. Паводле родных, ён быў вельмі засмучаны праз тое, што з ім здарылася, але не настолькі, каб быць гатовым да добраахвотнага адыходу з жыцця. Яшчэ ў СІЗА ён пачаў старанна рыхтавацца да пераводу ў калонію — збіраў цыгарэты, цукар, гарбату і каву ў разліку на тое, што яны спатрэбяцца ў лагеры, — кажа знаёмы Шлетгаўэраў.
Суразмоўца «Люстэрка» таксама дадаў, што яшчэ ў следчым ізалятары ў Дзмітрыя з’явіліся некрытычныя праблемы са здароўем:
— Пакуль Дзіма быў у СІЗА, у яго нарадзіўся сын, і ён вельмі перажываў, што гэта здарылася ў яго адсутнасць. Мабыць, ён моцна нерваваўся, праз што моцна палысеў, у яго з’явіўся варыкоз. Але здзяйсняць суіцыд ён не планаваў. Наадварот, збіраўся пісаць прашэнне пра памілаванне і спадзяваўся хутчэй выйсці на волю, убачыць сына і жонку.
Паводле нашай крыніцы, Дзмітрый казаў родным, што ў следчым ізалятары да яго ставіліся добра, аднакамернікі і адміністрацыя праблем не стваралі.
З Брэсцкага СІЗА ў магілёўскую ПК-15 мужчыну перавялі ў першыя дні кастрычніка 2024 года. Знаёмы сям'і сцвярджае, што Дзмітрыя адразу ж адправілі ў штрафны ізалятар. Прычыны такога пакарання ён не ведае.
Ужо 12 кастрычніка сям’я Шлетгаўэра атрымала ад адміністрацыі калоніі паведамленне пра трагедыю. У пасведчанні пра смерць стаіць дата 11 кастрычніка 2024 года.
Нагадаем, 31 кастрычніка праваабарончы цэнтр «Вясна» паведаміў пра смерць у калоніі палітычнага зняволенага. 1 лістапада «Люстэрку» ўдалося даведацца яго імя.
Дзмітрый Шлетгаўэр — грамадзянін Расіі. Інфармацыя пра «таемны» суд над ім з’явілася ў канцы жніўня. Паведамлялася, што мужчыну прызналі вінаватым у «спрыянні экстрэмісцкай дзейнасці» (ч. 1 арт. 361−4 КК) і «шпіянажы» (арт. 358 КК). Яго асудзілі на 12 гадоў калоніі.
Чытайце таксама
