Аляксандр Лукашэнка 25 жніўня наведвае Беларускі дзяржаўны ўніверсітэт, паведамляе яго прэс-служба. Падчас наведвання рэзкай крытыцы падвергнуўся рэктар БДУ Андрэй Кароль — адзін з самых ідэалагічна правільных людзей у сістэме вышэйшай адукацыі.
Лукашэнка заявіў, што яму дакладваюць «пра наяўнасць шэрагу праблем у функцыянаванні Беларускага дзяржаўнага ўніверсітэта».
«Чаго граху хаваць, да мяне даходзіць розная інфармацыя пра працэсы, якія адбываюцца апошнім часам у ВНУ. Яны мяне насцярожваюць. Тым больш я памятаю 2020 год, дзе вы „бліскуча“ сябе паказалі. Але я вам ніякіх заўваг не рабіў. Напэўна, вы гэта заўважылі. Не крытыкаваў вас. Я лічыў, што вы ж прасунутая частка нашага грамадства і самі з часам ацэніце ўсё тое, што вы тут нарабілі. Або нашыя дзеці перш за ўсё. Ды і выкладчыкі вызначыліся, калі ўжо адкрыта. Таму любыя негатыўныя тэндэнцыі, нават самыя маленькія, у самым пачатку свайго развіцця, мяне насцярожваюць», — сказаў Лукашэнка, малодшы сын якога вучыцца ў гэтай ВНУ.
Паводле яго словаў, сітуацыя ў ВНУ «вывучалася рознымі ведамствамі», у тым ліку адміністрацыяй Аляксандра Лукашэнкі, Беларускім інстытутам стратэгічных даследаванняў і Нацыянальнай акадэміяй навук. Сярод выяўленых гэтымі структурамі праблем — «непрадуманая кадравая палітыка кіраўніцтва, недастатковая ўцягнутасць рэктарата ў адміністрацыйную працу, перш за ўсё рэктара», «недахопы ў арганізацыі ідэалагічнай і выхаваўчай работы з калектывам і студэнтамі».
«Выснова, да якой прыйшлі адказныя асобы, у тым ліку Адміністрацыя прэзідэнта (орган, які перш за ўсё займаецца кадравымі пытаннямі): дэцэнтралізацыя кіраўнічай вертыкалі і слабая згуртаванасць працоўнага калектыву цягнуць за сабой страту кіравальнасці ВНУ і стратай перадавых пазіцый у навуковай і адукацыйнай сферах», — сказаў Лукашэнка і падкрэсліў, што «гэта недапушчальна».
Адносна атэстацыі рэктара БДУ ўрад унёс радыкальную прапанову «ў сувязі з наяўнасцю значнай колькасці праблемных пытанняў у дзейнасці як універсітэта, так і Ліцэя БДУ». Гэтае меркаванне падтрымлівае і Міністэрства адукацыі.
«Я пакуль не схіляюся да такога рашэння. І гэта адна з найважнейшых падставаў і прычынаў сённяшняй нашай сустрэчы», — заявіў Аляксандр Лукашэнка. Паводле яго словаў, «з бухты-барахты кадравае рашэнне прымаць, асабліва ў галоўнай ВНУ краіны, непрымальна».
Паводле словаў Лукашэнкі, урад на яго даручэнне правёў атэстацыю рэктараў усіх ВНУ краіны.
«Вынікі, шчыра вам скажу, несуцяшальныя. Асобныя рэктары спачываюць на лаўрах, дэлегуючы свае кіраўнічыя функцыі намеснікам, займаюцца публіцыстыкай, выконваюць выключна прадстаўнічыя функцыі», — сказаў палітык.
Нагадаем, Андрэй Кароль стаў рэктарам Беларускага дзяржаўнага ўніверсітэта ў 2017 годзе. Пасля выбараў 2020 года паказаў сябе ідэалагічна правільных прыхільнікам дзейнай улады: выкладчыкі, якія запісалі ў верасні таго года відэазварот супраць гвалту ў дачыненні да мірных пратэстоўцаў і ў падтрымку затрыманых студэнтаў, былі звольненыя. Многія студэнты, якія ўзялі ўдзел у акцыі, былі адлічаныя. Некаторыя — пасаджаныя.