Падчас вяртання ў Расію з Беларусі грамадзяне, якія ехалі па трасе з Віцебска праз пункт пропуску «Лабок», сутыкнуліся з доўгай чаргой. Пра гэта піша «Фонтанка».
Адзін з чытачоў выдання расказаў, што чэргі на беларуска-расійскай мяжы пачаліся з 5 траўня, калі Беларусь увяла праверку.
— Стаю больш за 4 гадзіны, наперадзе відаць мяжа, белы знак, КПП і за ім 100 метраў прыкладна. То-бок, мяркуючы па колькасці машын наперадзе, яшчэ паўтары-дзве гадзіны стаяць. Цэнзурных словаў няма. <…> Хоць некалькі разоў на год езджу праз гэты пункт, і на святы езджу, але такога не было ніколі, — расказаў «Фонтанке» чытач, які перасякаў мяжу 9 траўня.
Паводле яго словаў, праходжанне мяжы ў зваротным кірунку, у Беларусь, цяпер крыху лягчэйшае: там ён заўважыў толькі 15−20 машын.
Іншыя кіроўцы пісалі ў тэлеграм-чаце пра перасячэнне беларуска-расійскай мяжы, што 9 траўня прастаялі ў чарзе на ўезд у Расію шэсць гадзін, і адзначалі, што стаяць давядзецца «яшчэ пару гадзін».
«Стаім 7 гадзін у бок кпп Лабок. Засталося яшчэ метраў 150 і прыкладна 50 машын», — напісаў позна ўвечары 9 траўня іншы карыстальнік.
Ужо 10 траўня ў чаце паведамілі, што чаргі больш няма ні ў бок Расіі, ні ў кірунку Беларусі.
Нагадаем, з 5 траўня на беларуска-расійскай мяжы ўвялі часовы памежны кантроль. У Дзяржпамежкамітэце «Люстэрку» раней растлумачылі, што гэта робіцца «ў рамках выканання ратыфікацыйнага пагаднення пра ўзаемнае прызнанне візаў з Расіяй».
Праз некалькі дзён, 6 і 7 траўня, на ўездзе ў Беларусь з РФ пачаў праводзіцца патокавы агляд і аўтамабіляў беларусаў.
Чытайце таксама
