У Мінскім гарадскім судзе 19 снежня пачалося першае судовае паседжанне па крымінальнай справе па абвінавачванні Аляксандры Герасімені і Аляксандра Апейкіна ў рамках спецыяльнай вытворчасці, піша праваабарончы цэнтр «Вясна».
Зачытваючы тэкст абвінаваўчага заключэння, пракурор адзначыў, што «неаднаразовыя заклікі да міжнародных арганізацый з боку фігурантаў прывялі да адмены некаторых спартовых мерапрыемстваў на тэрыторыі Беларусі». Таксама была нанесеная «шкода нацыянальнай бяспецы Беларусі ў палітычнай і сацыяльнай сферах», паведаміла БЕЛТА.
У прыватнасці, быў адменены чэмпіянат Еўропы па роварным спорце на трэку. Як растлумачыў дырэктар ДУ «Белспортазабеспячэнне» (арганізатар міжнародных мерапрыемстваў, якія праводзяцца на тэрыторыі Беларусі) Максім Азановіч, што выступае прадстаўніком грамадзянскага заяўніка, установай быў аплачаны ўнёсак у памеры 200 тысяч еўра ў сувязі з намерамі краіны правесці гэты чэмпіянат. У далейшым ад еўрапейскіх структур быў атрыманы ліст з інфармацыяй пра адмену мерапрыемства, пры гэтым унёсак не вяртаўся.
Нагадаем, трохразовай медалістцы Алімпійскіх гульняў, чэмпіёнцы свету і Еўропы па плаванні Аляксандры Герасімені, якая раней узначальвала Беларускі фонд спартыўнай салідарнасці (БФСС), і выканаўчаму дырэктару БФСС Аляксандру Апейкіну інкрымінаваныя заклікі да мераў абмежавальнага характару (санкцый), іншых дзеянняў, скіраваных на нанясенне шкоды нацыянальнай бяспецы Рэспублікі Беларусь.
Згодна з матэрыяламі справы, абвінавачаныя ў жніўні 2020 года стварылі не зарэгістраванае ва ўстаноўленым парадку на тэрыторыі Рэспублікі Беларусь аб’яднанне «Беларускі фонд спартыўнай салідарнасці». Праз яго з дапамогай СМІ і глабальнай камп’ютарнай сеткі Інтэрнэт «распаўсюджваліся загадзя ілжывыя звесткі і выдумкі пра падзеі, якія мелі месца на тэрыторыі Рэспублікі Беларусь перад і пасля выбараў прэзідэнта».
Што такое спецыяльная вытворчасць
Як тлумачаць на сайце СК, «спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Рэспублікі Беларусь і ўхіляецца ад яўкі ў орган, які вядзе крымінальны працэс». То-бок спецвытворчасць — фактычна першы крок да нядаўна ўзаконеных у Беларусі завочных судоў над тымі, хто знаходзіцца за мяжой.
Разам з абвяшчэннем аб адкрыцці спецыяльнай вытворчасці СК выклікае фігурантаў у Беларусь для правядзення следчых дзеянняў — публікацыя гэтай інфармацыі на сайце ведамства паводле цяперашняга закона лічыцца належным паведамленнем. Усіх іх чакаюць у Мінску ў Цэнтральным апараце СК на вуліцы Фрунзе, 19.
Нагадаем, Аляксандр Лукашэнка ў ліпені падпісаў закон пра змены ў Крымінальна-працэсуальны кодэкс, якія дазваляюць судзіць беларусаў, што знаходзяцца за мяжой, завочна і нават асуджаць іх на расстрэл.
