Лідарка дэмакратычных сіл Святлана Ціханоўская выступіла на сесіі Парламенцкай асамблеі Савета Еўропы (ПАСЕ) і прапанавала пачаць распрацоўку дарожнай карты ўступлення будучай дэмакратычнай Беларусі ў Савет Еўропы.
«Калі мы гаворым пра дэмакратычную будучыню Беларусі, мы гаворым пра дэмакратычную будучыню ўсёй Еўропы. Сёння ў нашым рэгіёне вырашаецца лёс свабоды і дэмакратыі. Ён вырашаецца як на палях бітваў ва Украіне, так і ў Беларусі. Тыранія спрабуе ўзяць рэванш, заняволіць нашыя народы і разбурыць нашыя каштоўнасці. Тыраны могуць саджаць людзей у турмы, разбураць гарады і шантажаваць нас ядзернай зброяй. Але яны ніколі — паўтару, ніколі — не знішчаць свабодалюбівы дух беларускага і ўкраінскага народаў», — сказала лідарка дэмсіл.
Святлана Ціханоўская нагадала, як развівалася супрацоўніцтва Савета Еўропы з дэмсіламі і адначасова з гэтым абрынулася супрацоўніцтва з рэжымам, і заклікала да далейшых дзеянняў у гэтым кірунку.
«Прапаную Савету Еўропы пачаць распрацоўку дарожнай карты ўступлення будучай дэмакратычнай Беларусі ў Савет Еўропы. Мы можам пазначыць неабходныя крокі і рэформы і пачаць працаваць над імі ўжо цяпер. У вас бязмежны досвед, а ў нас бязмежнае жаданне стаць часткай Савета Еўропы. Уступленне ў Савет Еўропы стане нашым першым крокам на шляху да ўступлення ў Еўрапейскі саюз. Так, гэта смела. Так, гэта амбіцыйна. Але чаму б не пачаць дзейнічаць ужо цяпер? Беларусь стане гісторыяй поспеху. Пуцін пацярпіць паразу. Лукашэнка пацярпіць паразу. І мы вернем нашую краіну назад у Еўропу, дзе яна гістарычна і павінная быць», — заявіла яна.
Лідарка дэмсіл таксама адзначыла, што беларусы не спыняцца, пакуль на волю не выйдуць усе палітвязні. «Пакуль апошні расійскі салдат не пакіне нашую краіну. Пакуль мы не правядзём суды за злачынствы супраць чалавечнасці. Пакуль мы не вернем сабе нашую краіну», — падсумавала Ціханоўская.