У Мінску днямі прайшоў канцэрт некалі папулярнага расійскага поп-гурта «Іванушкі International», гледачы падзяліліся ўражаннямі ў TikTok. Аказалася, не ўсе засталіся ў захапленні.
Так, адна з карыстальніц назвала канцэрт найгоршым у сваім жыцці.
«Не магу стрымацца і не расказаць пра найгоршы канцэрт у маім жыцці. 7 лістапада быў канцэрт гурта „Іванушкі“ ў Мінску. Мы купілі загадзя білеты, думалі, 7 лістапада ўспомнім маладосць, дзяцінства, паслухаем песні. Прыехалі з такім настроем», — расказала аўтарка відэа.
Паводле яе, шоу пачалося пазней, чым абяцалі, але гэта «стандартна бывае на канцэртах», аднак тое, што адбывалася потым, засмуціла дзяўчыну.
«Канцэрт пачаўся з нейкага незразумелага гурта (я нават не памятаю назвы), нібыта гэта папулярны гурт 90-х. Яны на разагрэве. Я думаю, ладна, праспяваюць песні дзве і паслухаем „Іванушак“. Але не, яны праспявалі шэсць песняў. З іх я ведала толькі адну. Зала ўжо была напружаная, калі шчыра, ужо нават паказвалі свае эмоцыі ўсе, што мы як бы не прыйшлі на гэты гурт, мы прыйшлі на канцэрт „Іванушак“», — патлумачыла дзяўчына.
@ivanova_o #концерт #иванушкиinternational ♬ оригинальный звук — Ms. Ivanova
Аднак і на гэтым «сюрпрызы» не скончыліся.
«Пасля гэтай групы выйшаў нейкі хлопец, я не памятаю, як яго завуць. Адну песню яго я ведала, астатнія ўсе таксама не. Ён таксама праспяваў песняў шэсць. Прайшла цэлая гадзіна, нарэшце выйшлі „Іванушкі“, але і настрой ужо быў сапсаваны, і ўражанні. Усе вельмі чакалі, прайшла куча часу, але ладна, дачакаліся, але што адбывалася далей… Так, яны спявалі ўсе гэтыя класныя песні, якія мы ўсе ведаем на памяць, але спявалі — гэта гучна сказана. Спяваў толькі адзін хлопец, які самы малады прыйшоў. Рыжы і Кірыл цёмненькі проста ўвесь час кудысьці сыходзілі і спявалі па пару словаў у песні»,-падзялілася дзяўчына.
Яна палічыла такія паводзіны максімальна непаважлівымі.
@svetlana_dvorak8 #иванушкиinternational #концерт #вмоменте💫 #capcutvelocity #CapCut #концерт ♬ оригинальный звук — Svetlana_dvorak
Іншыя гледачы таксама выказалі падобнае меркаванне, найбольшае абурэнне выклікаў менавіта «разагрэў».
Так іншая карыстальніца апублікавала фрагмент выступу артыстаў перад асноўным шоу і адзначыла, што «пад такі разагрэў галоўнае не заснуць», а таксама што «ўсе чакалі „Іванушак“», а «больш за паўгадзіны слухалі незразумела што».
Праўда, карыстальнікі ў каментарах параілі ёй уважлівей чытаць афішу перад купляй білетаў, бо там былі пазначаныя ўсе гэтыя выканаўцы, таму дзіўна слухаць скаргі.
Дадамо, у анонсе было сказана, што «ў рамках канцэрта легендарнага гурта „Іванушкі International“ 7 лістапада ў Палацы спорту выступіць таленавіты electro-pop выканаўца Varzan», а таксама што «акрамя гэтага выканаўцы ў канцэрце возьме ўдзел таксама вядомы гурт „Восток“. Папулярны расійскі музычны калектыў, найяскравейшы праект 90-х», які ўтварыўся ў 1995 годзе і стаў вядомы дзякуючы такім хітам, як «Миражи», «До встречи», «Танец желтых листьев», «Снежная королева».