Навукоўцы з ісландскай кампаніі deCODE genetics выявілі, што 4% людзей маюць генатып кароткага жыцця. Вынікі даследавання былі апублікаваныя ў New England Journal of Medicine.
Падчас працы каманда навукоўцаў засяродзілася на выяўленні пэўных генатыпаў, якія звязаныя з працягласцю жыцця. Для гэтага быў секвенаваны геном 57 933 паддоследных з Ісландыі.
Аказалася, што чатыры працэнты паддоследных маюць генатып, асацыяваны з сардэчна-сасудзістымі захворваннямі, ракам і парушэннем абмену рэчываў — іх медыяна выжывальнасці была на тры гады карацейшая, чым у астатніх.
Навукоўцы таксама высветлілі, што мутацыі ў гене BRCA2 павялічваюць рызыку развіцця раку малочнай і падстраўнікавай залозы і яечнікаў, а таксама скарачаюць працягласць жыцця на сем гадоў. А аберацыі гена LDLR правакуюць высокі ўзровень халестэрыну і сардэчна-сасудзістыя захворванні і скарачаюць працягласць жыцця на шэсць гадоў.
«Нашыя вынікі сведчаць пра тое, што генатыпы, выяўленыя ў нашым даследаванні, могуць прадказаць сур’ёзнае захворванне і могуць мець значны ўплыў на працягласць жыцця», — заявіў адзін з аўтараў артыкула і навуковец з deCODE genetics Патрык Сулем.