Пара гродзенцаў замовіла таксі праз сэрвіс Uber, але даехаць да запланаванага месца ім не ўдалося: даведаўшыся, праз якую праграму яны выклікалі машыну, кіроўца адмовіўся іх везці. Справа скончылася сваркай і падраным паліто пасажыра. Пра сітуацыю, у якой цяпер разбіраецца міліцыя, напісаў гродзенскі блог S13.
Паводле пацярпелых кліентаў, канфлікт адбыўся 17 студзеня. Пара выклікала таксі праз Uber, каб дабрацца дадому:
— Прыехаў белы Volkswagen без апазнавальных налепак. Нам трэба было ехаць на Траецкую, але каля Лядовага палаца спорту кіроўца, калі даведаўся, праз які сэрвіс мы выклікалі таксі, затармазіў, пачаў лаяцца матам і крычаць, што ён нас нікуды не павязе далей.
Потым кіроўца выйшаў з машыны, адчыніў дзверы і пачаў выцягваць пасажыра з яго месца, расказваюць гарадзенцы.
— Мы яму казалі: давязіце нас да месца прызначэння, раз узялі заказ. Але кіроўца працягваў лаяцца, біць рукамі і выцягваць майго мужа з салона. У выніку паліто мужа парванае. Калі ён убачыў, што мы яго здымаем на камеру, ляпнуў дзвярыма і працягваў настойваць, каб мы выйшлі з машыны.
Муж і жонка выклікалі міліцыю. Нараду, які прыехаў на месца, кіроўца заявіў, што не працуе таксістам: нібыта маладыя людзі падышлі да яго самі і папрасілі падвезці, успамінаюць гарадзенцы.
У прэс-службе УУС Гродзенскага аблвыканкама інцыдэнт пацвердзілі, цяпер праводзіцца праверка.
Дарэчы, так і застаецца незразумелым, што менавіта таксіст меў супраць Uber.