Варожая рыторыка адносна Масквы абцяжарыць працэс перамоваў пра мір. Пра гэта заявіў дзяржсакратар ЗША Марка Рубіа, піша Deutsche Welle.
Злучаныя Штаты збіраюцца не дапусціць выкарыстання «варожай» рыторыкі ў дачыненні да Расіі на сустрэчы міністраў замежных справаў краін «Вялікай сямёркі» (G7), якая з 12 да 14 сакавіка пройдзе ў канадскім Шарлевуа (правінцыя Квебек). Пра гэта ў панядзелак, 10 сакавіка, заявіў дзяржсакратар ЗША Марка Рубіа. «Мы лічым, што варожая рыторыка часам абцяжарвае прыцягненне бакоў канфлікту да перамоваў», — цытуе яго агенцтва AFP.
Пры гэтым, паводле Рубіа, гаворка не ідзе пра падтрымку канкрэтнага боку ў рамках урэгулявання вайны ва Украіне. Іншыя міністры замежных справаў G7 могуць прытрымлівацца іншага меркавання, аднак цяпер Вашынгтон — адзіны бок, які здольны забяспечыць магчымасць перамоваў, падкрэсліў дзяржсакратар ЗША.
Раней агенцтва Bloomberg паведамляла, што падчас перамоваў наконт праекта сумеснай заявы «Вялікай сямёркі» ЗША настойваюць на ўзмацненні жорсткасці фармулёвак у дачыненні да Кітая і змякчэнні палажэнняў, якія датычаць РФ. У прыватнасці, Вашынгтон патрабаваў выдаліць слова «санкцыі», а таксама замяніць фармулёўку, якая спасылаецца на «здольнасць Расеі весці вайну» супраць Украіны, словамі «атрыманне даходу». Акрамя таго, з праекта асноўнага камюніке, з якім азнаёмілася агенцтва, зніклі ўсе згадкі расійскай агрэсіі. Замест гэтага ў тэксце вітаюцца «ўсе намаганні» для дасягнення пагаднення пра спыненне агню, піша Bloomberg.
Перамовы ЗША і Украіны ў Саудаўскай Аравіі
Сваю заяву Марка Рубіа зрабіў падчас пералёту ў Саудаўскую Аравію, дзе ў аўторак, 11 сакавіка, адбудуцца перамовы дэлегацый Украіны і ЗША, прысвечаныя планам па дасягненні перамір'я ў краіне, якая зазнала напад Расіі. Са словаў дзяржсакратара ЗША, сустрэча ў Джыдзе «будзе мець ключавое значэнне» для аднаўлення амерыканскай ваеннай дапамогі Украіне.
Чакаецца, што падчас перамоваў з амерыканскімі афіцыйнымі асобамі Кіеў прапануе паветранае і марское перамір'е з РФ, паведаміў агенцтву AFP неназваны ўкраінскі чыноўнік. «У нас сапраўды ёсць прапанова пра спыненне агню ў небе і на моры, бо гэта варыянты, якія лёгка рэалізаваць і кантраляваць, і з іх можна пачаць», — сказаў ён.