Зачыняецца прыватная ВНУ «БІП — Універсітэт права і сацыяльных тэхналогій». Пра гэта «Люстэрку» расказаў адзін са студэнтаў ВНУ, у адміністрацыі навучальнай установы нам пацвердзілі гэтую інфармацыю. Вось што ўдалося даведацца.
Імя суразмоўцы змененае дзеля яго бяспекі
— Чуткі хадзілі даўно, але днямі ад аднаго з метадыстаў я даведаўся, што ўсё гэта праўда, — расказаў студэнт БІП Дзмітрый. — Рашэнне прынялі заснавальнікі, і для многіх яно будзе жахлівым сюрпрызам. Я студэнт-завочнік на апошнім курсе і цяпер нават не ўяўляю, як буду адвучвацца гэты апошні год.
Афіцыйнай заявы пра закрыццё на сайце ВНУ няма. Таму пад выглядам бацькі аднаго са студэнтаў журналіст патэлефанаваў у прыёмны пакой рэктара ўніверсітэта.
— На рашэнне заснавальнікаў адукацыйная дзейнасць універсітэта спыняецца з 30 жніўня 2024 года, — адказала сакратарка. — Усе студэнты, якія на гэты момант у нас ёсць, будуць пераведзеныя ў іншыя ВНУ горада Мінска. Усё гэта будзе праходзіць цэнтралізавана. Толькі трэба трошкі пачакаць, пакуль з’явіцца афіцыйная інфармацыя і стануць вядомыя ўсе ВНУ, куды будуць пераводзіць дзяцей. Але хвалявацца не варта: усе будуць пераведзеныя, і навучанне працягнецца з 1 верасня ў іншых ВНУ.
Пра прычыны закрыцця БІП сакратарка рэктара нічога не сказала.
— Гэта рашэнне заснавальнікаў, — уздыхае жанчына. — Чаму яны так вырашылі, я не ведаю.
БІП — адна з найстарэйшых прыватных ВНУ Беларусі. Яго ў 1990-м годзе адкрыў Сцяпан Сокал — навуковец і прадпрымальнік. Да 2020-га года ён быў рэктарам універсітэта. А 5 снежня таго ж года ён памёр. Імаверна, ад каранавіруса («Бяда, якая ахапіла ўсю планету, забрала і нашага лідара», — гаворыцца на сайце ўстановы).
Першапачаткова БІП называўся Мінскай вышэйшай юрыдычнай школай пры Саюзе юрыстаў БССР. У 1991-м школа была перайменаваная ў Беларускі інстытут правазнаўства, а ў сакавіку 1995-га атрымала ліцэнзію ВНУ.
У 2021 годзе ўстанова стала ўніверсітэтам і была перайменаваная ў «БІП — Універсітэт права і сацыяльных тэхналогій».
У віншаванні рэктара БІП з нагоды 30-годдзя ВНУ ў 2020 годзе сцвярджалася, што за час працы там падрыхтавалі больш за 30 тысяч спецыялістаў рознага профілю: юрыстаў, эканамістаў, бухгалтараў, юрыстаў-міжнароднікаў і іншых. Таксама паведамлялася, што выпускнікі працуюць у дзяржаўных органах кіравання, праваахоўнай сістэме Беларусі, камерцыйных арганізацыях. Некаторыя з іх займаюць высокія дзяржаўныя пасады.