«Гатовыя да выканання задач па прызначэнні». Лукашэнку далажылі пра завяршэнне зладжвання рэгіянальнай групоўкі войскаў

Аляксандр Лукашэнка 6 студзеня прыбыў на 230-ы агульнавайсковы палігон Абуз-Лясноўскі, дзе размешчаная расійская частка сумеснай групоўкі войскаў.

Як расказалі ў Мінабароны, прадстаўнік расійскіх Узброеных сіл далажыў Лукашэнку пра завяршэнне баявога зладжвання частак і злучэнняў рэгіянальнай групоўкі войскаў.

Паведамляецца, што сумесныя беларуска-расійскія вучэнні правялі мотастралковыя і танкавыя падраздзяленні, спецыяльныя войскі, у тым ліку падраздзяленні СПА.

«На дадзеным этапе падраздзяленні Узброеных сіл Расійскай Федэрацыі гатовыя да выканання задач па прызначэнні», — сказаў прадстаўнік УС РФ.

Нагадаем, Расія і Беларусь дамовіліся пра разгортванне сумеснай рэгіянальнай групоўкі войскаў. Паведамлялася, што ў Беларусі размесцяць каля 9 тысяч расійскіх вайскоўцаў, РФ таксама перакіне каля 170 танкаў, да 200 баявых браніраваных машыны і да 100 гармат і мінамётаў калібрам больш за 100 мм.

Напярэдадні ў Мінабароны паведамілі, што ў рамках захавання ваеннай бяспекі Саюзнай дзяржавы нарошчванне рэгіянальнай групоўкі войскаў Беларусі і Расіі працягнуць. Мэта ўзмацнення рэгіянальнай групы войскаў — умацаванне абараназдольнасці Саюзнай дзяржавы. Таксама плануецца правядзенне сумеснага лётнага вучэння.