Следчыя высветлілі падрабязнасці аварыі ў Мінскай вобласці, у якой сур’ёзныя траўмы атрымаў матацыкліст. Крымінальная справа ў дачыненні да кіроўцы аўтамабіля скіраваная ў суд, паведамілі ў прэс-службе Следчага камітэта.
Паводле звестак следства, увечары 14 верасня 2024 года на 69-м кіламетры трасы М7/Е28 Мінск — Ашмяны — мяжа Літоўскай Рэспублікі (Каменны Лог) сутыкнуліся Geely і матацыкл Honda.
Следчыя высветлілі, што кіроўца красовера — 63-гадовы жыхар сталіцы — не прапусціў 20-гадовага матацыкліста, які ехаў галоўнай дарогай у сустрэчным кірунку. Парушыўшы ПДР, мужчына пачаў манеўр і выехаў на паласу сустрэчнага руху, пазбавіўшы матацыкліста магчымасці пазбегнуць сутыкнення.
У выніку ДТЗ байкер атрымаў цяжкія цялесныя пашкоджанні.
Следчыя прызначылі больш за сем аўтатэхнічных экспертыз і правялі следчы эксперымент, каб высветліць дакладны механізм сутыкнення і вызначыць, якія фактары спрыялі трагедыі.
Кіроўца Geely сваю віну ў ДТЗ прызнаў часткова, бо лічыў, што матацыкліст меў магчымасць не дапусціць сутыкнення. Аднак у СК прааналізавалі сабраныя матэрыялы і прыйшлі да высновы, што прычынай здарэння стала злачынная нядбайнасць 63-гадовага мужчыны, які праявіў няўважлівасць і распачаў манеўр, не пераканаўшыся ў яго бяспецы.
Дзеянні мінчука кваліфікавалі па ч. 2 арт. 317 КК (Парушэнне правілаў дарожнага руху асобай, якая кіруе транспартным сродкам, што прывяла па неасцярожнасці да нанясення цяжкага цялеснага пашкоджання).